30. januara 1018 wobzamknychu wupósłancy němskeho kejžora Heinricha II. a pólskeho wójwody Bólesława I. na Budyskim hrodźe měrowe zrěčenje, kotrež zakónči dołholětny wojerski konflikt wobeju knježerjow. Składnostnje tysaclětneje róčnicy tutoho podawka přeprošuje Serbski institut a Leibnizowy institut za stawizny a kulturu wuchodneje Europy (GWZO) 30. a 31. januara 2018 na mjezynarodnu konferencu, wěnowanu tutomu wuznamnemu měznikej němsko-pólskich stawiznow, do Budyšina.
W srjedźišću dwudnjowskeje konferency steja historiske wobstejnosće Budyskeho měra. 15 wědomostnicow a wědomostnikow z Němskeje, Pólskeje a Čěskeje budźe ze stawizniskeje a archeologiskeje perspektiwy politiske, towaršnostne a kulturne wuwiće we Łužicy, Pólskej a Čěskej kaž tež w němsko-romskim mócnarstwje w zažnym 11. lětstotku rozjimować. Budyski měr z lěta 1018 steji dźensa symbolisce za přeměnjate stawizny poćahow mjez Němskej a Pólskej. Zdobom znazornja wón hižo tysaclětnu mostowu funkciju dwurěčneje Łužicy w němsko-pólskich poćahach.
Nadrobny plan konferency a druhe informacije namakaće na webstronje Serbskeho instituta: www.serbski-institut.de. Zastup je darmotny. Z organizatoriskich přičin pak prosymy wo dočasne přizjewjenje přez mejlku hač do 24. januara 2018 pod Ten adres pocztowy jest chroniony przed spamowaniem. Aby go zobaczyć, konieczne jest włączenie w przeglądarce obsługi JavaScript..
Konferenca je dźěl Budyskeho dialogoweho projekta “1000 lět Budyski měr” a spěchuje so w ramiku programa “Sharing Heritage. Europske kulturne herbske lěto 2018” přez społnomócnjenu Zwjazkoweho knježerstwa za kulturu a medije.