W nocy 27. junija 2006 je prof. dr. Leszek Kuberski, krótko do swojich 50. narodninow - na słužbnej jězbje - w Romje zemrěł. Wón je sobuzałožićel Uniwersity w Opolu, hdźež běše někotre lěta z prorektorom a wot zańdźeneho lěta z direktorom Historiskeho instituta. 

Prof. Kuberski je so 13. julija 1956 w Namysłowie narodźił a hižo jako šuler wo Serbach zhonił. Skutkowanje a dóńt serbskeho patriotu Jana Skale - kotryž je w tutym měsće w Druhej swětowej wójnje 1945 zahinył - je jeho tak jara zaběrał, zo je sej jeho za tema doktorskeho dźěła wubrał. Wuslědki swoje disertaciji su jako kniha "Jan Skala. Zarys biografii politycznej", w Opole 1993 wušli. Dalša za nas Serbow wažna kniha je monografija polsko-serbskich stykow lěta 1945-1950, na kotrejž je wón pilnje sobudźěłał.

Za prof. Kuberskeho njeběchu Serbja za do- a powójnski čas zajimawe tema, ale wón - historikar - běše cyle dźensniši. Na jeho iniciatiwu załoži so "Stowarzyszenie Polsko-Serbołużyckie "Pro Lusatia" lěta 2004 towarstwo přećelow Serbow, kotrež je hižo lěto pozdźišo přistupiło k Domowinje a je z našim asociěrowanym čłonom. Tele towarstwo wuznamjeni so přez to, zo organizuje hižo wosme lěto "Dny Łuźyckie - Serbske dny" z najwšelakorišimi zarjadowanjemi - su to přednoški na tamnišej uniwersiće, ale tež rokowe koncerty. A towarstwo wuda hižo štwórte lěto tež časopis "Pro Lusatia". Prof. Kuberski běše ze šefredaktorom časopisa a wot spočatka sem z předsydu towarstwa.

Młody wědomostnik je wězo dopisował do časopisa a so wobdźělił na mjezynarodnych konferencach Maćicy Serbskeje - kaž na česć Arnošta Muki w Chośebuzu (2004) a Adolfa Černyho w Praze (2004). Časćišo je tež Łužicu wopytał, zańdźene lěto smy jeho z mandźelsku hišće witali na Mjezynarodnym folklornym festiwalu "Łužica" w Chrósćicach.

Z prof. Leszekom Kuberskim zhubimy wuznamneho wědomostnika, wěrneho a swěrneho młodeho přećela Serbow.

Dźakliwje a w česćownosći na njeho spominamy.

Prof. L. Kuberski pochowany , "Serbske Nowiny", 17.07.2006 

Opole. Sta ludźi z města Opole a wokoliny kaž tež z kraja a wukraja přewodźeše zašły pjatk připołdnju na tamnišim pohrjebnišću k rowu ćěło prof. dr. Leszeka Kuberskeho, prorektora Uniwersity Opolskeje a předsydy Pólsko-serbskeho towarstwa Pro Lusatia. 

Z kwětkami, wěncami a swěčkami pyšachu čerstwy row. Katolscy duchowni wukonjachu pohrjebne swjatočnosće. Profesor Leszek Kuberski bě njenadźicy w starobje 49 lět w Romje na zaprajenje wutroby zemrěł. Wosebje wo njeho žarujetaj mandźelska a syn. Při wotewrjenym rowje hódnoćeše rektor uniwersity prof. dr. Józef Musielok zasłužby zemrěteho na wědomostnym polu, do kotrehož po jeho wuprajenjach słušeja tež slědźenja k serbskim stawiznam a k wosobje Serba-wótčinca Jana Skale. Na pohrjebje wopokazachu prof. Kuberskemu česć a dźakowanje tež městopředsyda Opolskeho pólsko-serbskeho towarstwa Piotr Pałys kaž tež předsyda Maćicy Serbskeje dr. Měrćin Völkel a referent Domowiny Jurij Łušćanski, kotrajž na row pletwu ze seklu w serbskich barbach połožištaj. (nl)